مەرەيتويلىق فورۋم ساراپشىلارى قۇرامىنا رەسەي ستراتەگيالىق زەرتتەۋلەر ينستيتۋتىنىڭ ديرەكتورى ميحايل فرادكوۆ, رف مەملەكەتتىك دۋماسىنىڭ كوميتەت توراعاسى, بريكس زەرتتەۋ جونىندەگى ۇلتتىق كوميتەتتىڭ باسقارما توراعاسى ۆياچەسلاۆ نيكونوۆ, ەادب جانىنداعى ەۋرازيالىق تۇراقتاندىرۋ جانە دامۋ قورىنىڭ باس ەكونوميسى ەۆگەني ۆينوكۋروۆ, "وركەنيەتتەر ديالوگى" زەرتتەۋ ينستيتۋتى باقىلاۋ كەڭەسىنىڭ توراعاسى ۆلاديمير ياكۋنين مەن رەسەي ساياسي زەرتتەۋلەر ورتالىعى كەڭەسىنىڭ توراعاسى ەۆگەني بۋجينسكي كىردى.
رف ساراپشىلارى كلۋبتىڭ بەسجىلدىق جۇمىستارىنىڭ ءداستۇرلى قاتىسۋشىلارى ەكەندىگىن اتاپ وتكەن ءلازىم.
جالپى ايتقاندا, بيىل نۇر-سۇلتان قالاسىندا حالىقارالىق دەڭگەيدەگى 50-دەن استام ساراپشىلار مەن ساياساتكەرلەر جانە ديپلوماتتار باس قوسادى. قازاقستان مەن رەسەيدى قوسقاندا اقش, يسپانيا, يتاليا, جاپونيا, سەربيا, اۆستريا, گرۋزيا, نورۆەگيا, قىتاي, قىرعىزستان, ءۇندىستان, بەلگيا, اۋعانستان, شۆەتسيا, وڭتۇستىك كورەيا مەن ۇلىبريتانيا ەلدەرىنەن مەيماندار كەلەدى.
ەستەرىڭىزگە سالا كەتەيىك, ايماقتاعى قاۋىپسىزدىك پەن گەوساياسات ماسەلەلەرىن تالقىلاۋعا ارنالعان اۋقىمدى الاڭنىڭ بەسىنشى جىلسايىنعى وتىرىسى 2019 جىلدىڭ 11-12-ءشى قاراشا كۇندەرى "نازارباەۆ ورتالىعىندا" وتەدى. كلۋب وتىرىسىنىڭ باستى تاقىرىبى: «ۇلكەن ەۋرازيا: جاھاندىق ىنتىماقتاستىقتىڭ جاڭا قۇرىلىمى جولىندا».
كلۋبتىڭ ساراپتامالىق تالقىلاۋىنا اقش, قىتاي جانە رەسەي اراسىنداعى شيەلەنىستىڭ ۋشىعۋى, ساۋدا پروتەكتسيونيزمى مەن پوپۋليستىك كوڭىل-كۇيدىڭ ورنىعۋى, سونداي-اق يران مەن سولتۇستىك كورەيا توڭىرەگىندە جاڭا كەلىسپەۋشىلىكتەردىڭ بوي كورسەتۋى سىندى وزەكتى ماسەلەلەر ارقاۋ بولماق.
اسىرەسە, ەۋرازيادا ىنتىماقتاستىقتىڭ بولاشاق قۇرىلىمىن قالىپتاستىرۋ تاقىرىبىنا ۇلكەن كوڭىل ءبولىنىپ, جاھاندىق قاۋىپسىزدىكتىڭ سىن-تەگەۋرىندەرىنە (زىمىران-يادرولىق سالاداعى باقىلاۋسىز جارىس ماسەلەسى) قارسى تۇرۋ جولدارىن ىزدەستىرۋگە نازار اۋدارىلادى.
شارا اياسىندا الەمدىك ەكونوميكا جانە ساياسات ينستيتۋتى استانا كلۋبىنىڭ قولداۋىمەن جاھاننىڭ جەتەكشى ساراپشىلارىنىڭ ستراتەگيالىق بولجامدارىن باعامداعان «ەۋرازيا 2020 ءۇشىن 10 باستى سىن-قاتەر» رەيتينگىسىنىڭ كەزەكتى شىعارىلىمى تانىستىرىلادى.
قازاقستاننىڭ تۇڭعىش پرەزيدەنتىنىڭ توراعالىعىمەن وتەتىن, ءىس-شارانىڭ نەگىزگى وزەگى سانالاتىن كلۋبتىڭ پلەنارلىق وتىرىسىندا «ۇلكەن ەۋرازيانى قۇرۋ: سەرىكتەستىكتىڭ جاڭا ۇلگىسى» تاقىرىبى قاۋزالادى.
كلۋب جۇمىسىن ۇيىمداستىرۋشىلار - قازاقستان رەسپۋبليكاسى تۇڭعىش پرەزيدەنتى-ەلباسى قورى مەن الەمدىك ەكونوميكا جانە ساياسات ينستيتۋتى.
Astana Club وتىرىسى قازاقستان رەسپۋبليكاسى تۇڭعىش پرەزيدەنتى-ەلباسى قورىنىڭ قارجىلىق قولداۋىمەن وتكىزىلەدى.
«استانا كلۋبىنىڭ» جۇمىسىنا ءداستۇر بويىنشا قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان ءابىش ۇلى نازارباەۆ قاتىسادى.
بەسىنشى باسقوسۋداعى وتىرىستاردىڭ ءبىر بولىگى «Chatham house» ەرەجەسىنە ساي ۇيىمداستىرىلادى. ياعني تالقى جابىق سيپاتتا وتكىزىلەدى جانە الەم مەن ەۋرازيانىڭ ەڭ وزەكتى ءارى كوكەيكەستى ماسەلەلەرى اشىق كوتەرىلەدى.
وسى جىلدار ىشىندە كلۋب وتىرىستارىنا الەمنىڭ 40 ەلىنەن 200-دەن استام سپيكەر قاتىستى.